Ekiyongobero kibuutikidde abatuuze ku kyalo Nabukone mu ggoombolola y’e Nambaale mu disitulikiti y’e Iganga, omutuuze bw’attiddwa mu ngeri ewuninkiriza abatuuze.
Ali Kalulu ali mu gy’obukulu 34 afumitiddwa emirundi 2 mu kifuba era amangu ddala afiiriddewo.
Poliisi egamba nti omutemu Yakubu Isabirye aliira ku nsiko mu kiseera kino era okunoonyereza kutandikiddewo.
Kigambibwa Isabirye asangiriza Kalulu ng’ali mu kaboozi ne mukyala we, kwe kusalawo okumutta.
Abamu ku abatuuze bagamba nti omukyala aludde ng’alumiriza Isabirye okwebuzabuza mu nsonga z’omu kisenge, kwe kusalawo okunoonya omusajja alina endasi, ayinza okumuwa ku ssanyu ly’okusinda omukwano.
Juma Kato, nga naye mutuuze agamba nti Isabirye abadde asukkiridde okulangira mukyala we nga basukkiridde obwenzi nga n’okwegata, ennaku zino okutya.
Wabula James Mubi omwogezi wa Poliisi mu bitundu bya Busoga agamba nti omulambo gwa Kalulu, gutwaliddwa mu ddwaaliro ekkulu e Iganga okwekebejjebwa nga n’omutemu Isabirye, Poliisi etandiise okumunoonya.
Ate Poliisi y’e Rakai ekutte sseduvuto ku misango gy’okusobya ku mwana omuto myaka 6 ku kyalo Kakumiro mu Tawuni Kanso y’e Lwamaggwa.
Joshua Ssempijja myaka 30 anoonyezeddwa abatuuze nga begatiddwa Poliisi era olukwattiddwa, asimattuse ogajambulwa abatuuze.
Ssempijja abadde mukwano gwa famire, era maama yamukkiriza, okuwerekera muwala we okukima amazzi ku luzzi kyokka mu kkubo yamwefuulidde, namusobyako.
Okusinzira ku batuuze nga bakulembeddwamu Jessica Najjemba, omwana yasangiddwa akawungeezi k’olunnaku Olwokusatu era yenna atonnya musaayi ssaako n’okulukusa amaziga nga n’okutambula tasobola kyokka yasobodde okutegeeza ekimutuseeko.
Mu kiseera kino, omwana akyali mu ddwaaliro erya Lwamaggwa HCIII ng’ali mu mbeera mbi era kigambibwa Ssempijja yamwabiza ebitundu by’ekyama.
Maama agamba nti Ssempijja, abadde mukwano gwe nnyo nga tamusuubira kusobya ku mwana we.
Wabula omwogezi wa Poliisi mu kitundu ekyo Muhammad Nsubuga agambye nti Ssempijja akwattiddwa ku misango gy’okusobya ku mwana omuto era atwaliddwa ku Poliisi y’e Lwamaggwa.
Nsubuga agamba nti Poliisi etandiise okunoonyereza ku nsonga ya Ssempijja.
Mu disitulikiti y’e Rakai, emisango gy’okusobya ku baana abato, okubakozesa emirimu, okutulugunyizibwa kweyongedde n’okusingira ddala mu kiseera kino eky’okulwanyisa Corona Virus Disease (COVID-19).
