Omuyimbi Ronald Mayinja alaze nti musajja atatya biduduma era mu kivvulu ky’omuyimbi Catherine Kusasira ku Serena Hotero mu Kampala ku Lwokutaano, yayimbidde Pulezidenti Yoweri Kaguta Museveni oluyimba ku bigenda mu maaso mu ggwanga.
Ku siteegi, yasuddemu oluyimba ‘Bizeemu’ okutegeeza Pulezidenti Museveni nti ezimu ku nsonga ezamutwala mu nsiko mu 1981 omuli ekitta bantu, okuwamba n’okutulugunya abantu n’ebirala bizzeemu ku mulembe gwe.
Wabula wakati mu kuyimba, Kusasira yalinye ku siteegi nga munyivu era amangu ddala yamugyeko akazindalo okumulemesa okufundikira oluyimba.
Kusasira agamba nti Mayinja mukwano gwe nnyo kyokka kyabadde kikyamu okuyimba oluyimba ‘Bizeemu’ mu kivvulu kye ate mu maaso ga Pulezidenti Museveni.
Ate Mayinja agamba nti yabadde alina okuyimba oluyimba olwo kuba yabadde afunye omukisa okutegeeza Pulezidenti Museveni ebigeenda mu maaso mu ggwanga.
Pulezidenti Museveni bwe yabadde ayogerako eri abantu mu kivvulu, yasiimye Mayinja okuyimba oluyimba olulungi kyokka yamutegeezeza nti ebintu byagamba nti bizzemu, alina okukomya okusasaanya obulimba.
Museveni agamba nti mu Gavumenti ye, abantu sekinoomu bebatwalira amateeka mu ngalo okwenyigira mu bikolobero ate mu Gavumenti ezavaako, abakulembeze mu buyinza bebaali emabega w’okutta abantu, okuwamba n’ebikolobero byonna.
Vidiyo y’oluyimba Bizeemu
https://www.youtube.com/watch?v=t-sZC3uoQwM
