Poliisi y’e Nwoya ekutte omukyala ku by’okutuga mutabani we naamutta.
Omukyala Eunice Ajok nga mutuuze ku kyalo Kal mu Tawuni Kanso y’e Anaka mu disitulikiti y’e Nwoya, yakwattiddwa ku by’okutta omwana we Stephen Akena myezi 11.
Abatuuze bagamba nti omukyala, aludde ng’alumirizza bba Martin Otema obwenzi, nga y’emu ku nsonga lwaki yasse omwana we, okusobola okulumya musajja we.
Ajok olw’amaze okutta omwana, yaddukidde ku poliisi okubategezaako era Poliisi amangu ddala yamukutte ku misango gy’obutemu.
Okusinzira ku mwogezi wa Poliisi mu bitundu bya Aswa, Patrick Jimmy Okema, omukyala Ajok atwaliddwa mu ddwaaliro okwekebejjebwa kuba kiteeberezebwa alinako obuzibu ku bwongo.
Ate abasawo ku ddwaaliro erya Anaka basobodde okwekebejja omulambo era gwawereddwa ab’enganda okuziikibwa nga Poliisi bwenoonyereza ekituufu ekyavuddeko omukyala okutta omwana we.
