Poliisi y’e Kawempe ekutte omusajja ku by’omulambo gw’omukyala ogwasangiddwa mu kasasiro ku ssaawa 2 ez’okumakya olunnaku olw’eggulo ku Lwokuna mu bitundu bye Bwaise.
Okusinzira kw’amyuka omwogezi wa Poliisi mu Kampala n’emirirwano, Luke Oweyesigyire, omulambo gwa Sanyu Edith gwalabiddwa abatuuze mu zone ya st Francis e Bwaise ne batemya poliisi mu bwangu.
Kitegeerekese nti ono abamusse basoose kumusobyako oluvannyuma omulambo gwe ne bagufumita ebiti mu bukyala.
Kigambibwa Edith kati omugenzi abadde mutuuze ku kyalo Kimumbasa e Bwaise era abatuuze bagamba nti abadde malaaya.
Poliisi yaleese embwa yaayo era eriko amaka g’omutuuze weyatuukidde, omusajja omu naakwatibwa abasirikale.
Omulambo gwatwaliddwa mu ddwaaliro ekkulu e Mulago okwekebejjebwa nga Poliisi bwenoonya abatemu.
