Poliisi y’e Namisindwa ekutte omuntu omu ku mmundu eyazuuliddwa akawungeezi k’olunnaku olw’eggulo, egambibwa nti ababbi, baludde nga bagyeyambisa okutigomya abatuuze.
Emmundu okuzuulibwa, kiddiridde ababbi okuwanyisiganya amasasi ne Poliisi akawungeezi k’olunnaku olw’eggulo ku Mmande ku luguudo lwe Tsekululu-Bwabwala mu disitulikiti y’e Namisindwa.
Oluvanyuma, Poliisi yakoze ekikwekweeto mwe yazuulidde emmundu, engato za Poliisi, yunifoomu y’ekitongole kya Poliisi ekikkakkanya obujagalalo ssaako ne ttooci.
Okusinzira ku mwogezi wa Poliisi mu bitundu bya Elgon John Robert Tukei, mu kikwekweeto Poliisi yakutte omuntu omu gwagaanye okwatuukiriza era agambye nti okunoonyereza ku babbi, kukyagenda mu maaso mu kiseera kino.
