Omusirikale, abadde omukozi mu kitongole ky’obwananyini ekikuumi ekya Saracen security company ettabi lye Kabale yekubye essasi ku mutwe erimutiddewo.
Musinguzi Dennis myaka 29, abadde mutuuze ku kyalo Bugongi mu ggombolola y’e Kabale mu disitulikiti y’e Kabale, yettidde ku Poliisi gy’abadde ayitiddwa okugibwako sitetimenti ku misango gy’okusobya ku mwana omuto.
Poliisi agamba nti Musinguzi yayitiddwa ku misango gy’okudda ku mwana omuto okumusobyako ali mu gy’obukulu 17 ku kyalo Rutenga cell mu Monisipaali y’e Kabale.
Ku Poliisi, abasirikale baalabiddewo nga Musinguzi yeekubye essasi ku mutwe eryamutiddewo.
Elly Maate omwogezi wa Poliisi mu bitundu bye Kigezi, agambye nti Musinguzi okwetta, yasobodde okweyambisa pisito era Omulambo gwe, gutwaliddwa mu ddwaaliro okwekebejjebwa.
Maate agamba nti Poliisi etandiise okunoonyereza lwaki Musinguzi abadde ateeberezebwa okusobya ku mwana ate oluvanyuma yesse.
