Omukyala omutuunzi w’emmere mu katale k’e Jinja eyakubiddwa essasi olunnaku olw’eggulo ku makya mu ssaawa za Kafyu, bwe yabadde agenda okusuubula, afiiridde mu ddwaaliro.
Evelyn Namulondo afudde enkya ya leero mu ddwaaliro e Jinja, gye yatwaliddwa ng’ali mu mbeera mbi olw’essasi eryamukutte mu kabutobuto.
Omu ku basawo agaanye okwatuukiriza erinnya lye, agambye nti Namulondo afudde olw’omusaayi omungi ogwamuvuddemu ssaako n’ebitundu ebizibu ebyakoseddwa omuli ekibumba.
Muganda w’omugenzi Agatha Musekwa agamba nti obutaba na nsimbi y’emu ku nsonga lwaki baalemeddwa okutwala Namulondo mu ddwaaliro eddene.
Mungeri y’emu asabye Gavumenti, okubakwasizaako okuggya omulambo mu ddwaaliro, entekateeka z’okuziika ssako n’okulabirira abaana b’omugenzi.
Namulondo abadde mutuuze ku kyalo Budhumbuli Ward era yakubiddwa bwe yabadde agenda okusuubula mu katale ka Amber Court Market ku ssaawa nga 11 ez’okumakya ng’ali ku bodaboda.
Kigambibwa, emmotoka ya Poliisi yabasaanze ku luguudo lwa Kyabazinga, owa bodaboda nagaana okuyimirira, ne bamukuba essasi.
Owa bodaboda yadduse wabula okusinzira ku mwogezi wa Poliisi mu bitundu bye Kiira, Abby Ngako agambye nti okunoonya omusirikale eyakubye essasi, kukyagenda mu maaso.
