Bya Nalule Aminah
Gavumenti evudde mu musango ogubadde guvunanibwa omuyimbi Dauda Mugema ne Pulodyusa w’ennyimba Jonah Muwanguzi ku bigambibwa nti bafulumya oluyimba oluvoola n’okumalako eddembe omukulembeze w’eggwanga lino Yoweri Kaguta Museveni.
Banno bafulumya oluyimba “Wumula Muzeeyi”, kyoka ne bakwattibwa amangu ddala nga balutadde.
Okusinzira ku ludda oluwaabi nga lukulembeddwamu Abdul Salaam Waiswa, wakati wa 2015 ne 2017, abavunaanibwa nga basinzira mu situdiyo zabwe ku Salama Road mu Goombolola y’e Makindye mu disitulikiti y’e Kampala, baafulumya oluyimba olwo, Wumula Muzeeyi olwamalako Pulezidenti Museveni eddembe lye.
Wabula enkya ya leero mu maaso g’omulamuzi Gladys Kamasanyu owa Buganda Road, oludda oluwaabi lusabye okuggyayo omusango kuba abakwatibwa basobodde okubonerera wadde babadde bayimbulwa dda kakalu ka kkooti era basobodde okuwa omulamuzi ekiwandiiko okuva eri Ssaabawaabi wa gavumenti.
Omulamuzi Kamasanyu akiriza okusaba kw’oludda oluwaabi omusango okuvaayo kyoka alagidde ebintu byona ebyaboyebwa ku muyimbi ne Polodyusa we, bibadizibwe omuli amassimu, emizindalo n’ebirala.
