Omukyala Commissioner of Police, Alalo Christine, Munnanyuganda ofiisa wa Poliisi eyafiiridde mu kabenje k’ennyonyi mu ggwanga erya Ethiopia ku lunnaku lwa Ssande, abadde alina ke yeekoleddewo era abadde tanyigirwa mu ttooke.
Omugenzi CP Alalo abadde alina amaka amatiribona mu bitundu bye Sseeta mu disitulikiti y’e Mukono nga y’omu ku basirikale abasula obulungi.
Abadde mukyala Nanwandu ng’alina abaana oluvanyuma lwa bba okufiira mu kabenje.
Okusinzira ku mwogezi wa Poliisi mu ggwanga Fred Enanga, Alalo yayingira Poliisi nga 18, August, 2018 era awereza mu bifo ebyenjawulo era wafiiridde ng’ali ku ddaala lya Commissioner of Police.
Mu kiseera kino, Poliisi esindise omusawo wa poliisi Dr. Moses Byaruhanga mu ggwanga erya Ethiopia okulemberamu entekateeka y’okunoonya ebisigalira bya CP Alalo ng’ali wamu ne famire y’omugenzi kuba abantu bonna ababadde ku nnyonyi bafuuse bisiriiza.
Enanga agamba nti balina okweyambisa endaga butonde okuzuula ebisigalira bya CP Alalo. Ennyonyi yabaddeko abasaabaze 149 n’abakozi munaana.
