Kyaddaki abakulu mu kitongole ekya Poliisi bakoze enkyukakyuka era abasirikale bangi basindikiddwa mu bitongole eby’enjawulo.

Okusinzira ku kiwandiiko ekyafulumiziddwa nga 24, September, 2019 nga kiteekeddwako omukono gwa Brig Jesse Kamunanwire, enkyukakyuka zikoleddwa mu bitongole okuli ekitabagana n’omuntu wa bulijjo ne Poliisi, abakulira Poliisi mu bitundu by’eggwanga eby’enjawulo n’ekikuuma abakungu mu ggwanga.

Mu nkyukakyuka, abadde akulira ekitongole ekivunaanyizibwa okukuuma abakungu n’abantu ab’ebitiibwa ( Very Important Police Protection Unit (VIPPU) CP Herman Owomugisha yasindikiddwa mu kitongole ekikakanya obujagalalo Field Force Police (FFP).

CP Hadijah Namutebi yalondeddwa okukulira ekitongole ekivunaanyizibwa okukuuma abakungu n’abeebitiibwa nga yavudde mu kitongole ekivunaanyizibwa okutabagana poliisi n’omuntu wa bulijjo.

Afande SP Phillip Mukasa abadde ayogerera poliisi mu kitundu kya Katonga yasindikiddwa okudduumira poliisi y’e Apac.

ACP Moses Otala yaggyiddwa mu kitongole ekikuuma abakungu natwalibwa mu kitongole ekivunaanyizibwa ku mbeera y’abaserikale ate ACP Patrick Lawot yatwaliddwa okumyuka akulira ekitongole ekikuuma abakungu mu ggwanga.

SP Diana Nyamisango abadde adduumira poliisi ku Jinja Road yasindikiddwa Pallisa ate SP Robert Katuramu yamuddidde mu bigere. ASP Sam Ssuubi yasindikiddwa okuduumira poliisi ye Bukwo, ASP Sulait Kitaka yatwadiddwa okuduumira poliisi ye Sembabule, SP Abby Ngwire Wasige yasindikiddwa  okuduumira poliisi ye Kyotera, ASP Patience Namara yasindikiddwa okuduumira poliisi e Nakasongola.

Ate ASP Michael Mutumba yasindikiddwa okukulira poliisi ku Yunivasite e Makerere, ASP  Besi Khaselele yasindikiddwa kukulira poliisi y’e Wakaliga, ASP Ismail Kifude yatwaliddwa okukulira poliisi y’e Kirangazi e Nakaseke n’abalala.

Munnamaggye Brig Kamunanwire abadde yakalondebwa omukulembeze w’eggwanga Yoweri Kaguta Museveni okukulira ekitongole kya Poliisi ekivunaanyizibwa ku kyuusa abaserikale era mu nkyukakyuka za, abasirikale 57 baakyusiddwa.

Enkyukakyuka zigendereddwamu okulongosa entambuza y’emirimu mu kitongole ekya Poliisi era ssaabadduumizi wa Poliisi Martin Okoth Ochola akola kyonna ekisoboka, abantu okuddamu okwesiga Poliisi mu bitundu byabwe ne ggwanga lyonna okutwaliza awamu.