Entiisa ebutikidde abatuuze ku kyalo Kinyu mu ggombolola y’e Butobere mu disitulikiti y’e Kabale, mutuuze munaabwe bw’attiddwa mu ngeri etabudde buli muntu.
Asiimwe Ambrose myaka 27 abadde egenti wa MTN mu kibuga kye Kabale, yabuziddwawo era ab’enganda n’emikwano, baduukidde ku Poliisi y’e Kabale okwekubira enduulu, akawungeezi k’olunnaku olw’eggulo ku Lwokubiri.
Omulambo gwa Asiimwe gwasangiddwa ku kyalo Kayanja cell mu ggombolola Nyakishenyi mu disitulikiti y’e Rukungiri era gw’alabiddwa abatuuze n’abaana ababadde bava ku ssomero ne batemya poliisi y’omu kitundu.
Omulambo gwasangiddwako ebiwundi eby’enjawulo n’okusingira ddala ku mutwe.
Okusinzira ku bakozi banne mu Kampuni ya MTN Kabale, Asiimwe abadde mukama waabwe mu kutambuza ssente ku bakozi ba Mobile Money era kigambibwa yabadde yakava mu bbanka ng’alina obukadde obusukka 10.
Omwogezi wa Poliisi mu bitundu bye Kigezi Elly Maate agambye nti tewali muntu yenna akwattiddwa wabula gwo omulambo gutwaliddwa mu ddwaaliro lye Rwakabengo okwekebejjebwa nga Poliisi bw’enoonya abenyigidde mu ttemu eryo.
Eddoboozi lya Elly Maate
