Poliisi mu Kampala ekutte abantu 16 abalindiridde okutwalibwa mu kkooti ku misango gy’okulya ebisiyaga.
Okusinzira ku mukutu ogwa mawulire ogwa BBC, omwogezi wa Poliisi mu Fred Enanga agamba nti 16 bagiddwa mu bitundu bya Kampala n’emirirwano era alipoota z’abasawo ziraga nti baludde nga balya ebisiyaga.
Sabiti ewedde, Minisita omubeezi avunaanyizibwa ku mpisa n’obuntu bulamu Rev. Fr. Simon Lokodo yategeeza nti Palamenti essaawa yonna egenda kuddamu okubaganya ebirowoozo ku tteeka lye bisiyaga.
Kinnajjukirwa nti omukulembeze w’eggwanga Yoweri Kaguta Museveni nga 24 February 2014 yateeka omukono ku tteeka erirwanyisa obuli bw’ebisiyaga mu Uganda.
Wabula nga 1, August, 2014 abalamuzi ba kkooti etaputa ssemateeka basazaamu etteeka, erirwanyisa okulya ebisiyaga olwa Palamenti okuliyisa mu ngeri emenya amateeka.
Mu kkooti nga bakulembeddwaamu omulamuzi Steven Kavuma, Augustine Nshimye, Eldard Mwangusha, Rabby Were ne Solome Bbosa, bategeeza nti Palamenti yayisa etteeka ng’omuwenda gw’ababaka ba Palamenti ogwetagisa tegumala.
Mu kuwa ensala yaabwe, baagamba nti amateeka agafuga Palamenti galagira sipiika okusooka okubala omuwendo gw’ababaka nga etteeka lyonna terinnayisibwa, okufuna omuwendo ogukkirizibwa mu mateeka.
Mu ssemateeka wa Uganda, Palamenti okuyisa etteeka lyonna ababaka bateekeddwa okuba ekitundu kimu kyakusatu wabula sipiika Rebecca Alitwala Kadaga bino byonna yabibuusa amaaso.
Palamenti yali eyisiza etteeka okulwanyisa ebisiyaga nga 20, December, 2013 ate nga 24, February, 2014, ne liteekebwako omukono omukulembeze w’eggwanga ate 1st August, 2014 abalamuzi ne balisazaamu.
