Omulamuzi wa kkooti ku Buganda Road Stellah Amabilisi alangiridde nga 2, December, 2019, okugoba emisango egivunaanibwa omutegesi w’ebivvulu Ssaalongo Andrew Mukasa amanyiddwa nga Bajjo owa Bajjo Events.
Bajjo ali ku misango ebiri okuli ogw’okukuma omuliro mu bantu n’okwogera ebigambo ebigendereddwaamu okunyiiza omukulembeze w’eggwanga.
Okusinzira ku ludda oluwaabi, mu June, 2019, mu bitundu okuli Masaka, Mbarara, Ibanda ne Kampala, Bajjo lwe yazza emisango egyo bwe yakwata kavidiyo ne kasaasaanira emitimbagano gya yintanenti.
Mu kkooti, munnamateeka wa Bajjo, Ssalongo Erias Lukwago asabye omulamuzi omusango agugobe kuba oludda oluwaabi lukyalemeddwa okuleeta abajjulizi.
Lukwago agamba nti ludda oluwaabi, lugamba nti fayiro ekyali ku Poliisi, ekiraga nti sibetegefu kugenda mu maaso n’omusango.
Okusaba kwa Lukwago, Omulamuzi kwasinzidde okwongezaayo omusango okutuusa nga 2, Desemba 2019, oludda oluwaabi oluleeta obujjulizi mu kkooti nga singa tebakikola, omusango agugobe.
