Omulamuzi wa kkooti enkulu mu kibuga kye Arua Anthony Ojok Oyuko aliko omusajja gw’asindise mu kkomera okusibwa amayisa oluvanyuma lw’okusingisibwa omusango gw’obutemu.
Moses Adrapi myaka 36 nga mutuuze ku kyalo Ozuku mu ggombolola y’e Pajulu yasindikiddwa mu kkomera ku misango gy’okutta omusuubuzi Emmanuel Etenedde.
Mu kkooti, oludda oluwaabi lugamba nti omusuubuzi Emmanuel Etenedde yattibwa nga 24, November, 2016 era omulamuzi bamwanjulidde abajjulizi babiri (2).
Oludda oluwaabi, lugamba nti Adrapi ne banne abakyaliira ku nsiko ku lunnaku olwo, bekweka mu nsiko mu katawuni ka Onduparaka ne bakuba Etenedde amasasi mu lubuto oluvanyuma ne balinya bodaboda ne badduka.
Etenedde yaddusibwa mu ddwaaliro kyokka nga tannafa yategeeza abasawo abatemu abamukubye amasasi era y’emu ku nsonga lwaki asingisiddwa omusango wadde ye abadde yegaanye omusango.
Omulamuzi asinzidde ku bujjulizi obulambikiddwa mu kkooti, asindika Adrapi mu kkomera okusibwa amayisa era amutegezezza nti waddembe okujjulira mu nnaku 14 bw’aba tamatidde nakibonerezo.
