Poliisi y’e Jinja etandiise okunoonyereza ku ngeri omwana myaka 17 Fred Maka gy’afiiridde mu Kampuni ekola empapula eya Paper and pulp company Papco ekkiro ekikeseza olunaku lwa leero.
Kigambibwa Maka y’omu ku bakozi abakola ekkiro era ekyuma ekitambuza empapula kyamukutte omukono ssaako n’omutwe ne kimulya.
Bakozi banne baasobodde okumuddusa mu ddwaaliro ekkulu e Jinja ne bategeezebwa nti abadde yafudde dda.
Omu ku bakozi mu Papco, Christine Achan, agambye nti ekyuma kyamulidde nnyo era yatwaliddwa mu ddwaaliro ng’attonya musaayi.
Ate muganda w’omugenzi Bayat Namulondo agamba nti okufa kwa Maka, bakutegeeredde ku mikwano gye ku ssimu eyabakubiddwa.
Agamba nti abakulira Papco tebanavaayo mu lwatu okubategeeza mu butongole ekyavuddeko okufa kw’omuntu waabwe.
Akulira abakozi ebuggwanjuba bwa Uganda, Rebecca Namusabi agambye nti mu nsisinkano wakati wa Famire n’abakulira Papco, bakiriziganyiza aba Papco okuleeta ssente zonna ezinaakola ku by’okuziika ne famire okusasulwa.
Mungeri y’emu agambye nti abagagga okulagajjalira abakozi y’emu ku nsonga lwaki abakozi bangi bafunye ebisago n’okufa.
Ate omwogezi wa Poliisi mu bitundu bye Kiira Diana Nandawula agambye nti Poliisi eyingidde mu nsonga ezo era okunoonyereza kutandikiddewo mbagirawo.
Mungeri y’emu agambye nti omulambo gukwasiddwa aba famire okutekateeka okuziikibwa.
