Poliisi y’e Soroti ekutte abantu babiri (2) nga bakuumi mu kitongole ky’obwananyini ku by’okusangibwa n’emmundu mu ngeri emenya amateeka.
Abakwate kuliko Patrick Omoda myaka 27 eyali omusirikale ku ddaala ku erya Special Police Constable ku Poliisi y’e Kiira nga mu kiseera kino, akola n’ekitongole ekya Track Security Company mu disitulikiti y’e Mukono ssaako ne Musa Opara myaka 26 nga mukuumi mu kitongole ekya Securiko Security Company e Bugolobi.
Okusinzira ku mwogezi wa Poliisi mu bitundu bye East Kyoga, Michael Odongo, Poliisi nga yegatiddwako amaggye baakoze ekikwekweeto ne bakwata Omoda ne Opara oluvanyuma lw’abatuuze okubekengera.
Mu kunoonyereza, emmundu namba SAR No 2201598903 yazuuliddwa ng’epanguluddwa, bagikwese mu nsawo n’amasasi 5.
Odongo agamba nti abakwate batwaliddwa ku Poliisi y’e Soroti ng’okunoonyereza wekugenda mu maaso.
