Poliisi mu Tawuni Kanso y’e Kakira atandiise okunoonyereza ku musirikale mu kitongole ky’obwananyini ekikuumi ekya Industrial Security Services Limited emanyikiddwa okuuma ebikajjo mu Kkampuni ya Kakira., ku by’okutta Omuntu ku Ssande ekiro, ekikeseza olwaleero.
Batista Atayo, myaka 28, abadde mutuuze ku kyalo Nailo mu Tawuni Kanso y’e Kakira mu disitulikiti y’e Jinja yattiddwa, omukuumi, Poliisi gweri mu kunoonya mu kiseera kino.
Poliisi e Kakira, omukuumi ali mu kunoonyezebwa, aguddwako emisango gy’obutemu.
Alipoota y’abasawo, eraga nti Atayo yakubiddwa essasi wakati w’olubuto n’embirizi nga yakoseddwa nnyo omutima n’ensigo, ekyavuddeko okufa kwe.
Oluvanyuma, abakuumi abatamanyiddwa nga begattiddwako omutemu, batutte omulambo mu ggwanika ly’eddwaaliro e Jinja kyokka balemeddwa okweyanjula eri abakulu, abakulira eddwaaliro.
Muganda w’omugenzi Robert Embati agambye nti yategeezeddwa ku ssimu nti muganda we attiddwa ku by’okubba sikulaapu kyokka byonna abisambaze.
Embati agamba nti muganda we, abadde musuubuzi wa sikulaapu amanyikiddwa mu tawuni y’e Kakira era asabye Poliisi okunoonyereza lwaki muganda we yattiddwa.
Ku nsonga eyo, omwogezi wa Poliisi mu bitundu bye Kiira Diana Nandawula, agambye nti Poliisi etandiise okunoonyereza ku nsonga eyo.
