Poliisi ya Flying Squad ezudde emmundu eyali yabibwa ku musirikale mu disitulikiti y’e Hoima.
Emmundu ezuuliddwa n’amasasi 19 mu kikweekweeto ekyakoleddwa, akawungeezi k’olunnaku olw’eggulo.
Okusinzira ku mwogezi wa Poliisi mu bitundu bya Aswa, Patrick Jimmy Okema, emmundu yazuuliddwa ku ssaawa 10 ez’akawungeezi mu maka ga Fred Onencan ku kyalo Awer mu ggombolola y’e Palema mu disitulikiti y’e Amuru.
Okema agamba nti emmundu yabibwa, ku musirikale eyali akuuma offisi ez’ekitongole ekivunaanyizibwa ku ddagala ekya National Drug Authority mu disitulikiti y’e Hoima.
Onencan yakulembeddemu Poliisi okubatwala mu makaage, awasangiddwa emmundu ssaako n’okunyonyola engeri gye yabibwa ku musirikale.
Mu kiseera kino akuumibwa ku Poliisi y’e Gulu ku misango gy’okusangibwa n’emmundu mu ngeri emenya amateeka.
