Entiisa n’ekiyongobero bibuutikidde abatuuze ku kyalo Kasenyi mu ggombolola y’e Bukimbiri mu disitulikiti y’e Kisoro, mutuuze munaabwe bw’asangiddwa nga yetugidde mu nnyumba ye.
Omulambo gwa Alfred Muhumuza abadde amanyikiddwa nga Kibedi myaka 45 gusangiddwa nga gulengejja ku muguwa gwa nayironi munda mu nnyumba.
Okusinzira ku mwogezi wa Poliisi mu bitundu bye Kigezi Elly Maate, Poliisi esobodde okwekebejja omulambo era musangiddwamu ekiwandiiko mu nsawo y’empale, ekyavuddeko Muhumuza okwetta.
Poliisi egamba nti Muhumuza ategeezezza nti mukyala we, abadde asukkiridde obwenzi n’okumulemesa okunyumya akaboozi nga y’emu ku nsonga lwaki yesse.
Omulambo gutwaliddwa mu ggwanika ly’eddwaaliro ekkulu e Kisoro era okunoonyereza kutandikiddewo.
