Bamukwatammundu basse omukunzi wa Forum for Democratic Change-FDC Emmanuel Atuhaire mu Tawuni Kanso y’e Lyantonde.
Omulambo gwasangiddwa akawungeezi k’olunnaku Olw’eggulo ku Lwomukaaga mu kitaba ky’omusaayi ku luguudo lwe Mwere Nyakinengo mu kibuga kye Biharwe Mbarara.
Kahiigwa Nafuka, ssentebe w’ekyalo Mwere Cell agamba nti yalabye omulambo ku ssaawa nga 12 ez’akawungeezi bwe yabadde agenda mu katawuni.
Denis Byabakwo, mukwano gw’omugenzi agamba nti abatemu basse Atuhaire bwe yabadde ava e Mbarara okudda awaka.
Mungeri y’emu agambye nti Atuhaire abadde alina ebbaala, okutunda ennyama y’embizzi ssaako n’okutunda amatooke.
Ate Edward Miiro, ssentebe wa FDC mu Tawuni Kanso y’e Lyantonde agamba nti yakoma okwogerako n’omugenzi akawungeezi k’olunnaku Olwokutaano era asabye Poliisi okunoonyereza lwaki Atuhaire yattiddwa ssaako n’okunoonya abatemu.
Atuhaire yavuganya ku bwa ssentebe bw’ekyalo KooKi ku kaadi ya FDC wabula yawangulwa Hamis Kyeyune owa National Resistance Movement (NRM).
Omulambo gukyali mu ddwaaliro lya Mbarara Regional Referral okwekebejjebwa nga ne Poliisi bwenoonyereza okuzuula ekituufu.
Ate e Masaka, ssemaka Francis Nsamba Ssentalo, atwaliddwa mu ddwaaliro ekkulu e Masaka ng’ali mu mbeera mbi oluvanyuma lw’abazigu okumufumita ekiso ku mutwe emirundi egy’enjawulo.
Ssentalo yabadde avuddeyo okutaasa owa Mobile Money eyabadde alumbiddwa okubibwa mu katawuni k’e Katwe mu kibuga kye Masaka ku ssaawa nga 2 ez’ekiro.
Ssentalo yataasiddwa abatuuze okumutwala mu ddwaaliro nga yenna atonnya musaayi oluvanyuma lwa babbi okumufumita ebiso ne badduka.
Abatuuze mu ngeri y’okwerwanako, baagobye ababbi era omubbi omu yakwattiddwa kyokka yakubiddwa okumutta, Poliisi nemutaasa.
Muhammad Nsubuga, omwogezi wa Poliisi mu kitundu ekyo (Greater Masaka) agamba nti mu kiseera kino Ssentalo n’omubbi batwaliddwa mu ddwaaliro lye Masaka nga bali mu mbeera mbi.
Nsubuga agamba nti omubbi eyakwattiddwa agenda kuyambako Poliisi okuzuula banne abaliira ku nsiko mu kiseera kino.
Mungeri y’emu Nsubuga alabudde abantu bonna abali mu mirimu gya Mobile Money okwegendereza ennyo n’okutegeeza ku Poliisi okuyambibwa singa bekengera omuntu yenna.
Obubbi bwa Mobile Money buzzeemu ssaako n’okutta abantu era bangi ku bali mulimu gwo bali mu kutya.
