Waliwo omusajja eyasimatuse okuttibwa mukyala we akawungeezi k’olunnaku Olwokubiri ku kyalo Lusanja, mu Tawuni Kanso y’e Kasangati mu disitulikiti y’e Wakiso.
Steven Okello ng’ali mu gy’obukulu 30, mukyala we Maurine Onziru yamuyiridde amazzi agokya ku ssaawa nga 2 ez’ekiro olw’okudda awaka mu ssaawa za kafyu ng’obudde bugenze.
Omusajja Okello ne mukyala we, bawangadde emyaka egisukka 2 wabula kigambibwa, omukyala abadde asukkiridde okwemulugunya nti bba, asukkiridde obwenzi nga y’emu ku nsonga lwaki ensonga z’omu kisenge, mu ddakika 2 zokka aba afundikidde emikolo ate ng’asukkiridde okufuluuta.
Okello nga musajja musazi w’anviri, amazzi gamwokeza ku mutwe, omukono ogwa ddyo, ku lubuto n’ebitundu by’ekyama era ensonga azongeddeyo ku Poliisi y’e Kiteezi, okufuna obwenkanya.
Agamba nti omukyala, amazzi yagaggye ku kyoto okumuyiira nga yekwasa eky’okudda awaka ku ssaawa 8 ez’ekiro.
Wabula akulira ebyokwerinda ku kyalo kye Lusanja Fred Ssepuuya, agamba nti obutakaanya mu maka bweyongedde mu kitundu kyabwe nga buli sabiiti, bafuna emisango egisukka musanvu (7).
Ssepuuya agamba nti abakyala okulumiriza abasajja obutamalaako mu kwesa empiki z’omukwano era y’ensonga enkulu evaako okulwanagana mu kitundu kyabwe.
Mu kiseera kino omukyala Onzira aliira ku nsiko era okusinzira ku mwogezi wa Poliisi mu Kampala n’emirirwano Luke Owoyesigyire, okumunoonya kutandikiddewo.
Wabula 100.2 Galaxy FM bw’ebadde ewayamu ne ssentebe w’ekibiina ky’obwannakyewa, ekirwanirira eddembe ly’abasajja mu ggwanga ekya Men’s Forum against domestic Violence in Uganda, Lauben Muhabuzi, agamba nti abakyala beyongedde okutulugunya abasajja wabula bangi basirika olw’okutya okuswala.
Muhabuzi awanjagidde abasajja abali mu mbeera y’ okunyigirizibwa okuddukira ku Poliisi okuyambibwa oba abakulembeze ku byalo.
Ebitongole byokwerinda nga bikulembeddwamu ekitongole ekya Poliisi bikutte abantu 29, abagambibwa okwenyira mu kutematema abatuuze b’e Kasokoso mu Monicipaali y’e Kira mu disitulikiti y’e Wakiso ne banyaga ebintu eby’enjawulo.
Ku lunnaku Olwokubiri, ababbi nga bakutte emitayimbwa, ebiso, ebyambe, amayinja, baalumba abatuuze ku byalo omuli Kiganda, Kireka ne Kasokoso era bageenda okuvaayo nga abatuuze banyiga biwundu.
Wabula addumira Poliisi mu bitundu bye Kira, Abbas Ssenyonjo, agamba nti ekitongole kya Poliisi nga kyegatiddwako amaggye ssaako n’ekitongole kya Bambega, baakoze ekikwekweeto era 29 bebakwattiddwa.
Abakwate bagiddwa Mbazulu mu nzigota, Kasokoso, kyokka abamu basobodde okuduuka.
Ebirala ebifa mu ggwanga – https://www.youtube.com/watch?v=VpBrR4w-1RA
