Akulembera akabinja ka bodaboda 2010, Abdullah Kitatta akabidde mu kkooti y'amaggye, oludda oluwaabi ku misango egimuvunanibwa, bwe lutandiise okusabukulula obujjulizi.
Oludda oluwaabi nga lukulembeddwamu Maj Raphael Mugisha, luleese omujjulizi Private Richard Kasajja myaka 24, omusirikale mu kitongole ky'amagye ekikesi ekya CMI era ategezeza kkooti nti Ssentebbe wa National Resistance Movement (NRM) e Lubaga Kitatta bamukwatira mu kabuyonjo ku Vine Hotel e Wakaliga mu ggombolola y'e Rubaga, nga 20, Janwali 2018.
Private Kasajja agamba nti mu kukwata Kitatta, mu kisenge mwe yali asula, mwasangibwamu emmundu ekika kya Pisito eyali ajjudde amasasi, emmundu endala ekika SMG ate mu mmotoka ya Kitatta, eyali epaakinze ku Hotel mwasangibwamu Pisito n'amasasi 15 n’ ebizibiti ebirala omuli yunifoomu z'amaggye biri (2), enkofiira y'amaggye 7 ebyasangibwa mu offiisi ya bodaboda 2010 e Wakaliga, ebiwaliriza Kitatta okuyunguka amaziga.
Kkooti era egaanye okuyimbula Kitatta kuba singa ekikolebwa, ayinza okudduka mu ggwanga kuba emisango egimuvunanibwa gya naggomola nga singa gimusinga, ayinza okusibwa amayisa.
Mungeri y'emu ssentebbe wa kkooti Lt. Gen. Andrew Gutti, agambye nti Kitatta alina enkolagana eyamaanyi ku bakulu mu kitongole kya Poliisi nga singa ayimbulwa ayinza okutataaganya okunoonyereza ate n'abantu abaleeteddwa okumweyimirirwa bayinza okulemwa okumusindikiriza, Kitatta okudda mu kkooti.
Kitatta aziddwayo ku Limada ku kkomera ly’amaggye e Makindye ate banne 12 okuli Sowali Ngobi, Amon Twinomujuni, Joel Kibirige, Matia Ssenfuka, Hassan Ssebata, John Kayondo, Hassan Ssengooba, Sunday Ssemogerere, John Ssebandeke, Hussein Mugema, Fred Bwanika ne Ibrahim Ssekajja baziddwayo e limanda mu kkomera e Luzira okutuusa nga 12, June, 2018.
Wabula munnamateeka wa Kitatta Sanywa Shaban, agamba nti ebizibiti ebireteddwa mu kkooti bagenda kubiwakanya kuba bipange.
