Poliisi y’e Mpigi etandiise okunoonyereza abenyigidde mu kutta Godfrey Asiimwe myaka 35, abadde omutuunzi w’amata.
Omulambo gwa Asiimwe, gusangiddwa nga gusuliddwa mu luwonko olutambuza amazzi ku luguudo oluva e Kampala okudda e Masaka okumpi ne Valley View Gardens.
Amata abadde agatambuza mu bitundu okuli Jjandira Cell, mu kibuga kye Kayabwe ne disitulikiti y’e Mpigi era omulambo gusangiddwa mu kitaba kya musaayi.
Okusinzira ku Kansala w’omu kitundu Farouk Lubega, Asiimwe yakubiddwa kuba omulambo, gusangiddwako ebiwundu ku mutwe, emikono oluvanyuma yatugiddwa.
Ate akulira Poliisi y’e Kayabwe, Achilles Atwebembere agambye nti bafunye amawulire g’okuttibwa kwa Asiimwa ku ssaawa 12:30 ez’okumakya era omulambo gutwaliddwa mu ggwanika ly’eddwaaliro Gombe okwekebejjebwa.
Mungeri y’emu agambye nti Poliisi etandiise okunoonyereza ekivuddeko Asiimwe okuttibwa.
