Ekikangabwa kibutikidde abatuuze mu disitulikiti y’e Jinja, omusirikale police constable bw’attiddwa mu ngeri etabudde abatuuze.
George Tanga abadde musirikale ku Poliisi mu paaka ya Takisi e Jinja era attiddwa nga busasaana enkya ya leero.
Okusinzira ku Muzamilu Izimba omu ku batuuze mu kitundu ekyo era aberabiddeko ng’omusirikale attibwa, ku ssaawa 11 n’ekitundu (5:30AM) ez’okumakya, Omusirikale Tanga aliko abantu babiri (2) baakutte ku by’okubba emitayimbwa.
Tanga bw’atuuse ku Poliisi, okuyingiza abakwate mu kaduukulu, omu ku bakwate abadde alina ejjambiya era naamutema ku mutwe.
Omusirikale agudde wansi ng’alajjana era abakwate bonna, baddukiddewo.
Ate Paul Nkore addumira Poliisi mu bitundu bye Kiira agambye nti emitayimbwa ebbiri (2) egibadde gibiddwa gisangiddwa ku Poliisi era ababbi, bagisudde oluvanyuma lw’okutta omusirikale waabwe.
Yo emmundu ekika kya AK47 esangiddwa okumpi n’omulambo.
Kigambibwa, abaana b’oku nguudo abenyigira mu kubba emitayimbwa n’okulonda sikulaapu bebenyigidde mu kutta omusirikale.
Wabula Sylvia Nangobi omu ku basuubuzi mu paaka y’e Jinja, agambye nti ne Poliisi esukkiridde obugayaavu mu kulawuna obudde obw’ekkiro, ekiviriddeko abaana b’oku nguudo okweyongera mu kitundu kyabwe ate nga babulabe.
Ate Resident District Commissioner (RDC) we Jinja Eric Sakwa agambye nti omusirikale Tanga atemeddwa nnyo ku mutwe n’ensingo, ekivuddeko okufa okw’amangu.
Agamba nti Poliisi etandikiddewo okunoonya abatemu.
