Kkooti y’amaggye esindise ku limanda mu kkomera e Luzira abantu 11 ku misango gy’okutta Detective sergeant, Fred Chemonges eyali omusirikale ku kitebe kya Poliisi e Mbale.
Abasindikiddwa e Luzira kuliko Private Bob Anichan, Ronald Ssekiranda Kizito amanyikiddwa nga Kamulegeya Sebalamu Joseph, Musa Kikomeko ne Private Dennis Byaruhanga.
Abalala ye Sudi Waiswa, Sepiria Wanyera amanyikiddwa nga Andrew, Mugarura Ahamad (Mugabi), Rajab Kaigwa, Swaibu Wengusi, Shafik Kufani, Musa Baido ne Umar Ssebalamu.
Mu kkooti, ssentebbe wa kkooti y’amaggye Lt. General Andrew Gutti bonna bagudwako gwa butemu.
Okusinzira ku ludda oluwaabi, nga 16, May, 2019 ku kyalo Namwasi ku luguudo lwa Mbale – Nabumali mu disitulikiti y’e Mbale, abavunaanibwa baakuba essasi eryaviirako Detective Sergeant, Fred Chemonges okufa bwe yali akulembeddemu okugoba ababbi.
Bonna 11 begaanye emisango gy’okutta Detective Sergeant, Chemonges, kkooti kwekubasindika ku limanda mu kkomera e Luzira okutuusa nga 17, December, 2019.
Oludda oluwaabi nga lukulembeddwamu Major Charles Masereje lutegezezza kkooti nti lufundikidde okunoonyereza era betegese bulungi okugenda mu maaso n’omusango.
