Kyaddaki Poliisi mu bitundu bye Aswa enokoddeyo ezimu ku nsonga lwaki abantu, basukkiridde okwetta mu kitundu kyabwe.
Okusinzira ku mwogezi wa Poliisi mu kitundu ekyo, Patrick Jimmy Okema okuva omwezi oguwedde ogwa December, 2019, okutuusa olunnaku olwaleero (7, Janwali, 2020), bantu abasukka 10 besse nga kivudde ku nsonga ez’enjawulo.
Okema anokoddeyo ensonga omuli obutabanguko mu maka, obwenzi obusukkiridde, abakyala okulemesa abasajja akaboozi.
Ensonga endala mwe muli ebirowoozo ebisukkiridde, okutya obuvunaanyizibwa ssaako n’abamu okuzuulibwa nti balina obulwadde n’okusingira ddala akawuka akaleeta siriimu.
Mungeri y’emu agambye nti abakulembeze ku byalo ssaako n’ebitongole ebikuume ddembe biteekeddwa okuvaayo okusomesa abantu akabi akali mu kwetta.
Okema agamba nti abantu balina okusomesebwa ebirungi ebiri mu kwogera ku nsonga zaabwe, okusinga okulowooza okwetta.
