Omuntu omu (1) afiiridde mu kabenje ate abasukka 20 batwaliddwa mu ddwaaliro e Jinja nga bali mu mbeera mbi, oluvanyuma lw’akabenje ku kyalo Bulumagi mu Monisipaali y’e Njeru mu disitulikiti y’e Buikwe ku ssaawa 11 ez’okumakya ga leero ku Lwokubiri nga 4, Febwali, 2020.
Okusinzira ku mwogezi wa Poliisi mu bitundu bye Ssezibwa, Hellen Butoto, Sanoni Kinobe myaka 37 yafudde ng’abadde mutuuze ku kyalo Kidera mu disitulikiti y’e Buyende.
Butoto agamba nti akabenje kabaddemu takisi namba UAG 195C ebadde eva e Kampala okudda e Jinja ne Fuso namba UAQ 310E ebadde eva Jinja okudda mu Kampala.
Mungeri y’emu agambye nti ku bantu 22 abatwaliddwa mu ddwaaliro, 15 bali mu mbeera nungi era Poliisi etandiise okunoonyereza ekivuddeko akabenje.
Eric Kaluya omu ku basomesa, abasimatuse okufiira mu kabenje, agambye nti takisi ebadde ekubyeko abazadde n’abaana abadda ku massomero era bangi ku bayizi bebafunye ebisago.
Ekifaananyi kya Daily Monitor
