Kyaddaki munamaggye eyalondeddwa okumyuka omuduumizi wa Poliisi mu ggwanga lino Brigadier Sabiiti Muzeyi alangiridde okubonereza abasirikale 3 abatoloka mu kutendekebwa kwa Poliisi e Kigo okwatandiika nga 7, Janwali, 2018.
Brig Sabiiti ng’alambula emirimu gya Poliisi
Abasirikale banno kuliko Probational Police Constables Kenneth Tamale, Julius Lwabayi ne Jerry Openyrwoth nga baali bavudde mu bitundu bye Masaka okuddamu okufuna obukugu kuba baali basukiridde okulagajjalira emirimu gyabwe n’okusingira ddala emmundu.
Kigambibwa baduuka mu kutendekebwa kyoka ensonga lwaki bakola ekikolwa ekyo, temanyiddwa.
Wabula Brig Sabiiti bwe yabadde afulumya abasirikale abamaliriza okutendekebwa 609 olunnaku olw’eggulo ku Lwomukaaga e Kigo, yagambye nti abasirikale bonna abatoloka tebalina mirimu mu kitongole kya Poliisi.
Mungeri y’emu yakaatiriza nti Poliisi erina okubaamu abantu abategeera ensonga, abagala eggwanga lyabwe, abetegefu okuweereza n’okukuuma ebikozesebwa mu byokwerinda omuli emmundu.
