Poliisi y’e Kabale ekutte abantu mukaaga (6) ku by’okutwalira amateeka mu ngalo ne batta omu ku batuuze.
Abakwate bali ku misango gy’okutta Livingston Rukarekoha abadde omutuuze ku kyalo Kategure cell mu ggombolola y’e Kyanamira mu disitulikiti y’e Kabale.
Kigambibwa nga 13, omwezi guno Ogwokusatu, omugenzi yakasuka amayinja ku nju ya ssentebbe w’ekyalo Karisti Katsigazi myaka 54 ne gayuza amabaati obudde obw’ekiro olw’ensonga etamanyiddwa.
Omugenzi abadde anoonyezebwa era yazuuliddwa akawungeezi k’olunnaku olwa Ssande nga yekwese ow’omutuuze Alice Tumwebaze ne bamukuba amayinja, emiggo n’ensambaggere okutuusa lwe yafudde.
Okusinzira ku mwogezi wa Poliisi mu bitundu bye Kigezi Elly Maate, Poliisi yakoze okunoonyereza era abantu 6 bakwattiddwa okuli ne ssentebbe w’ekyalo ku misango gy’okutta omuntu.
Maate era agambye nti waliwo abatuuze bangi abakyaliira ku nsiko abenyigidde mu kutwalira amateeka mu ngalo kyokka bonna bageenda kunoonyezebwa.
Abakwate abalala kuliko Bebwa Selevesti myaka 64, Baguma Telesiforo 49, Besigye Benon 48, Sunday Medad 50 ne Aringitwe Moses 45.
