Poliisi ekutte omusajja ku by’okulima n’okutambuza enjaga mu bitundu by’eggwanga eby’enjawulo.
William Babigambe nga mutuuze we Mutungo Zone 4, bamukutte ku ssaawa nga 8 ez’ekkiro, e Mutungo mu Divizoni y’e Nakawa.
Okusinzira ku Poliisi, Babigambe abadde ku pikipiki ekika kya Bajaj Boxer namba UEL 023U ng’atisse ekuttiya omuteekeddwa enjaga.
Babigambe akirizza nti ye mulimi ate musuubuzi wa njaga ng’alina ffaamu yiika eziwera e Mpambire mu disitulikiti y’e Mpigi ku luguudo lwe Masaka.
Poliisi egamba nti Babigambe ateeberezebwa okuba omu ku bantu abatunda enjaga mu bitundu bye Luzira, Kitintale, Kasokoso, Kirinnya ne Mutungo.
Mu kiseera kino ali ku Poliisi y’e Mutungo ku misango gy’okusangibwa n’enjaga era okunoonyereza kukyagenda mu maaso.
