VIDIYO! Laba ekikomando ku Poliisi y'e Kabalagala, abadde agenze okubba emmundu bamukubye mizibu, awolomye ng'ekikere

Poliisi y’e Kabalagala etandiise okunoonyereza ku musajja Hussein Kakonge ali mu gy’obukulu 46, eyagenze ku Poliisi okusaba obuyambi kyokka nawunzika ng’akubye omusirikale waabwe Constable Bamwesigye Junior, okwagala okuba emmundu n’essimu.

Okunoonyereza kulaga nti Kakonge, agamba nti asikaali mu kitongole ky’obwannanyi ekikuumi ekya Security 2000 ekisangibwa mu bitundu bye Muyenga.

Luke Owoyesigyire, amyuka omwogezi wa Poliisi mu Kampala n’emirirwano, agamba nti Kakonge yageenze ku Poliisi y’e Kabalagala akawungeezi k’olunnaku olwa Mmande okuyambibwa.

Ku Poliisi, Kakonge yagambye nti agobeddwa bakama be nga ne mu nnyumba agobeddwa ng’asaba okusula ku Poliisi.

Owoyesigyire agamba nti offiisi ekola ku nsonga z’okukuuma obulamu n’ebintu, yawadde Kakonge ebikunta ne bamukkiriza okwebaka okumpi n’ekifo awatuukirwa abantu.

Ku ssaawa 7 ez’ekiro, Kakonge yalabirizza omu ku basirikale eyabadde atudde ku katebe okulinda abantu n’okukuuma ekifo PC Bamwesigye, kwe kumulumba era yamukubye Helementi ku mutwe n’ekigendererwa eky’okumuggyako emmundu n’essimu.

Afande PC Bamwesigye yakoze kyonna ekisoboka okulemesa okumuggyako emmundu era amangu ddala yeegatiddwako banne okuli abasirikale abakyala n’abasajja, okukuba Kakonge n’okumulemesa okutwala emmundu.

Amangu ddala Kakonge yakwattiddwa era mu kiseera kino ali ku Poliisi y’e Kabalagala.

Okunoonyereza!

Owoyesigyire agamba nti Poliisi ekoze okunoonyereza era ebiriwo biraga nti yali musajja munnamaggye wa UPDF mu 1966 era yali omu kw’abo abenyigira mu kulwanyisa abatujju b’akabinja ka Lord Resistance Army.

Poliisi egamba nti Kakonge yadduka mu maggye nga bakomyewo okuva mu ggwanga erya Somalia era oluvanyuma ne yegatta ku kitongole kya Security 2000 gye yagobeddwa.

Owoyesigyire agamba nti mu kiseera kino Poliisi etandiise okunoonyereza okuzuula lwaki Kakonge yadduka mu maggye, lwaki yabadde agezaako okubba emmundu ssaako n’okutwalibwa okwekebejjebwa oba ddala omutwe gwe gukola bulungi.

Kakonge aguddwako emisango omuli okwagala okutta omuntu, okwagala okubba emmundu n’okudduka mu maggye era essaawa yonna wakutwalibwa mu kkooti amangu ddala nga Poliisi efundikidde okunoonyereza.

Vidiyo!