Kyadaaki Omubaka we Kyadondo East mu Palamenti Robert Kyagulanyi Ssentamu amanyikiddwa nga Bobi Wine yaleteddwa mu Kkooti y’amaggye esangibwa mu bitundu bye Gulu olunnaku olw’eggulo ku Lwokuna mu nkukutu era bannamateeka be bokka bebakiriziddwa okuyingira mu kisenge kya kkooti.
Okusinzira ku kiwandiiko ekyafulumiziddwa omwogezi w’amaggye Brig Richard Karemire, Bobi Wine yasimbiddwa mu Kkooti y’e Gulu ku by’okusangibwa
n’emmundu, amasasi mu kisenge kye ekya woteeri “Pacific” mu kibuga Arua ku Mmande nga 13, August, 2018 ekiro.
Kkooti y’amaggye yalagidde Bobi Wine atwalibwe ku limanda mu kkomera ly’amaggye e Makindye okutuusa nga 23, August, 2018.
Bannamateeka ba Bobi Wine ababadde mu kkooti okuli Asuman Basalirwa ne Medard Sseggona Lubega Kalyamaggwa, bagamba nti omuntu wabwe yaguddwako omusango gw’okusangibwa ne by’okulwanyisa mu ngeri emenya amateeka.
Mungeri y’emu bagambye nti Bobi Wine yabadde mu mbeera mbi nnyo kuba yakubiddwa era y’emu ku nsonga lwaki balemeseza abantu okuyingira mu kkooti.
Basalirwa agamba nti Bobi Wine tasobola kutunula, okwogera wadde okutambula era bakwatirira mukwatirire.
