Eyali amyuka omukulembeze w’eggwanga Specioza Naigaga Wandira Kazibwe myaka 64 atabukidde omubaka we Kyadondo East mu Palamenti Robert Kyagulanyi Ssentamu amanyikiddwa nga Bobi Wine mu kuziika Bishop Cyprian Bamwoze eyafa nga 11, February, 2019, kookolo w’omu musaayi.
Olunnaku olw’eggulo ku Ssande, Bishop Bamwoze yaziikiddwa ku lutiiko e Bugembe mu disitulikiti y’e Jinja era kwetabiddwako abantu bangi ddala omuli n’ebikonge okuva mu gavumenti.
Wabula mu kwogerako eri abakungubazi, Specioza Kazibwe yatabukidde Bobi Wine okukyankalanya emikolo gy’okuziika nga tewali yamuyise, omuntu eyafudde (Bishop Bamwoze) abadde tamumanyi, tamulabangako tamanyi byabadde akola.
Ebigambo bya Specioza Kazibwe byatabudde abakungubazi era bangi ne batandika okumungoola.
Specioza Kazibwe okutabuka, kyavudde ku Bobi Wine okutuuka ku lutiiko e Bugembe nayanirizibwa mu mizira okuva eri abakungubazi era ye mukulembeze yekka eyafunye obuwagizi obungi ng’atuuka.
Abakulembeze abalala abetabye mu kuziika kuliko Sipiika wa Palamenti Rebecca Kadaga, Katikkiro owookubiri Kirunda Kivejinja, ababaka ba Palamenti n’abalala.
