Omuvubuka Godfrey Wamala amanyiddwa nga Troy olunnaku olwaleero, lw’ategeera emyaka gy’agenda okuwangalira mu kkomera ku misango gy’okutta eyali omuyimbi nakinku Mowzey Radio.
Sabiti eno ku Mmande, omulamuzi wa kkooti enkulu etuula Entebbe, Jane Frances Abodo, yasingisa Troy omusango gw’okutta Radio mu butanwa.
Aba famire, baali baasaba omulamuzi Abodo, Troy avunaanibwe gwa butemu kyokka mu kkooti, omulamuzi yategeeza nti oludda oluwaabi, lwalemwa okuleeta obujjulizi obulaga nti Troy yakuba Radio mu bugenderevu.
Troy wadde yasingisiddwa omusango gw’okutta Radio mu butanwa, bwe yali yewozaako yegaana eby’okulwanagana ne Radio.
Radio yakubwa ku bbaala ya De-Bar e Ntebe nga 22, January, 2018, n’afiira ku Case Medical Centre, Kampala nga 1, February, 2018, naziikibwa e Nakawuka mu disitulikiti y’e Wakiso nga 3, February, 2018.
Omulamuzi asuubirwa okuwa ensala ye wakati w’essaawa 5 ku 6 ez’okumakya.
