Poliisi y’e Hoima ekutte omukyala ku by’okutta muganzi we gwe yasangirizza ng’amira eddagala, eriweweeza ku siriimu erya anti retrial viral drugs (ARVs).
Poliisi egamba nti, akawungeezi k’olunnaku olw’eggulo nga zikunukiriza okuwera essaawa emu (1) omusajja Emmanuel Tumusiime, 35 abadde omutuuze ku kyalo Kijumba cell mu Tawuni Kanso y’e Kigorobya, yattiddwa era omulambo gwe, gwasangiddwa mu kitaba kya musaayi n’okuvaamu omusaayi mu matu.
Okusinzira ku mwogezi wa Poliisi mu bitundu bya Albertine, Julius Hakiza, omukyala yakutte embazzi nagikuba muganzi we Tumusiime era amangu ddala, yasibye ennyumba, okuddukira ku Poliisi ng’ali ku bodaboda, okubategeeza nga bw’asse omuntu.
Omukyala agamba nti abadde yeesiga nnyo muganzi we nga kwesa empiki z’omukwano tayambala bupiira, ekiraga nti ayinza okuba nga yamulwaza dda siriimu, ekyavuddeko obusungu okumutta.
Hakiza agamba nti Poliisi, yasobodde okuggya omulambo mu nnyumba, okutwalibwa mu ddwaaliro okwekebejjebwa ate omukyala ali ku kitebe kya Poliisi e Hoima ku misango gy’obutemu nga Poliisi bw’enoonyereza.
