Poliisi e Soroti ekutte omusajja abadde alimbalimba abantu nti atunda eddagala eriwonya ssennyiga Covid-19, asaasanyizibwa akawuka ka Corona Virus.
Okusinzira ku mwogezi wa Poliisi mu bitundu bya East Kyoga David Ongom, omusajja Lazarus Kungu myaka 24 yakwattiddwa akawungeezi k’olunnaku olw’eggulo.
Kungu mutuuze ku kyalo Angopet mu ggombolola y’e Soroti era mu disitulikiti y’e Soroti, yasangiddwa ku ddwaaliro ekkulu Soroti n’akacupa akalimu ebintu ebiringa amazzi nga bimyufu.
Poliisi okumukwata, yasangiddwa n’omu ku batuuze ku ddwaaliro ng’amutegeeza nga bwe yavumbudde eddagala eriwonya ‘Corona Virus’ ng’ali mu kunoonya abantu abalyetaaga.
Poliisi egamba nti Kungu yabadde amaze okutunda eddagala mu batuuze era essaawa yonna bamutwala mu kkooti ku misango gy’okutunda ebintu ebigingirire n’okuzannyira ku bulamu bw’abantu.
