Poliisi ekutte basatu (3) ku by’omukyala afiiridde mu ssabo enkya ya leero ku kyalo Kirwanila mu katawuni k’e Matugga mu disitulikiti y’e Wakiso.
Omulambo gwa Noeline Nansamba myaka 36 gusangiddwa mu ssabo lya Shaban Kayiza, omusawo w’ekinnansi mu kitundu ekyo.
Okusinzira kw’amyuka omwogezi wa Poliisi mu Kampala n’emirirwano Luke Owoyesigyire, Nasamba olufudde, omusawo w’ekinnansi Kayiza, addukiddewo ku Poliisi y’omu kitundu, okugitegezaako.
Ku Poliisi, Kayiza agambye nti Nansamba yatuusiddwa ku ssabo akawungeezi k’olunnaku aba famire ng’ali mu mbeera mbi era omu ku bakozi be John Luswata gwe basanzeewo.
Owoyesigyire agamba nti Poliisi ekutte abantu 3 bagiyambeko mu kunoonyereza omuli omusawo w’ekinnansi Kayiza, n’abakozi be omuli Luswata ne Siraje ate gwo omulambo gutwaliddwa mu ddwaaliro e Mulago okwekebejjebwa.
