Abatuuze basse abantu basatu (3) mu disitulikiti y’e Kakumiro ku misango gy’okwenyigira mu kubba ente mu budde bw’ekiro.
Abattiddwa kuliko Stephen Kasapuli ne banne okuli Owen ne Ronald nga bonna, babadde batuuze b’e Birembo mu ggoombolola y’e Birembo.
Abatuuze, babakutte nga busasaana enkya ya leero era bonna bakubiddwa emiggo okutuusa lwe battiddwa.
Okusinzira ku ssentebe w’ekyalo Charles Lwanga, abattiddwa baludde nga batigomya abatuuze okutwala ebisolo byabwe omuli ente, embizzi, embuzzi ssaako n’enkoko.
Okubatta, kigambibwa akawungeezi k’olunnaku olw’eggulo, benyigidde mu kubba emu ku Nte z’abatuuze ne basalawo okubateega mu kkubo era basangiddwa nga bali ne Nte eyabiddwa.
Wabula omwogezi wa Poliisi mu bitundu bya Albertine, Julius Hakiza avumiridde eky’abatuuze okutwalira amateeka mu ngalo era emirambo gitwaliddwa mu ddwaaliro ekkulu e Kakumiro okwekebejjebwa.
