Poliisi ya Flying Squad nga yegatiddwako ekitongole ekinoonyereza ku buzzi bw’emisango ekya Criminal Investigation Directorate –CID bakutte abantu 2 ku misango gy’okwenyigira mu kubba emmotoka ezisukka 30.
Abakwattiddwa kuliko Hussein Kiseka ne Habibu abaludde nga banoonyezebwa.
Ekikwekweeto kyakulembeddwamu akulira Flying Squad Godwin Turamye oluvanyuma lw’okufuna okwemulugunya okuva mu bantu abenjawulo abasukka 20 ku mmotoka ezibiddwa.
Charles Twine, omwogezi wa CID agamba nti okunoonyereza kulaga nti ku bantu abasukka 20 bagamba nti emmotoka zaabwe zatwalibwa Kiseka ne Habibu era y’emu ku nsonga lwaki bakwattiddwa.
Twine agamba nti okunoonyereza kulaga nti abakwate baludde nga batigomya abatuuze mu bitundu bye Kampala, Mbarara, Busia ne Tororo.
