Poliisi etandiise okunoonyereza ku ngeri omusajja myaka 38 gye yattiddwamu mu kulwanira Nnamwandu mu disitulikiti y’e Rukungiri ekkiro ky’olunnaku Olwomukaaga.
James Rweitaemazi abadde omutuuze ku kyalo Kikunyu cell mu ggombolola y’e Ruhinda yattiddwa oluvanyuma lw’omusajja omulala okumusanga mu nju ya muganzi we.
Okusinzira kw’addumira Poliisi mu disitulikiti y’e Rukungiri, Moses Nanoka, omukyala yafiirwa bba omwaka oguwedde ogwa 2018 era abadde alina abasajja ab’enjawulo abamuwa ebyetaago ng’omuntu.
Omusajja William Owakubariho, 40 yakubye Rweitaemazi oluvanyuma yamukumyeko omuliro nga yeyambisa akatimba k’ensiri.
Poliisi egamba nti Owakubariho n’omukyala Owomugisha Consolant, 38 baakwattiddwa okuyambako Poliisi mu kunoonyereza.
Ate ssentebbe w’ekyalo Kikunyu cell, Silvestre Tindarwesire agamba nti Owomugisha abadde alina abasajja abenjawulo oluvanyuma lwa bba okufa.
