Kkooti enkulu mu Kampala egyeeko emisango ssaako n’okusazaamu ekibonerezo ekyaweebwa Dr. Stella Nyanzi mu kkooti ya Buganda Road wansi w’omulamuzi Gladys Kamasanyu egy’okweyambisa emitimbagano gya kompyuta mu ngeri emenya amateeka.
Omulamuzi wa kkooti enkulu Henry Peter Adonyo agambye nti kkooti ya Buganda Road yali terina lukusa kuwuliriza musango gwa Dr. Nyanzi era amangu ddala, alagidde Dr Stella Nyanzi ayimbulwe okuggyako ng’alina emisango emirala.
Mungeri y’emu agambye nti kkooti, yakola nsobi okulemesa Dr. Nyanzi okufuna amazima n’obwenkanya mu kwewozaako.
Dr. Stella Nyanzi eyali omusomesa ku yunivasite e Makerere yakwatibwa oluvanyuma lw’okuteeka ekitontome ku mukutu ogwa Face Book nga 16, September, 2016 bwe yali ayagaliza omukulembeze w’eggwanga Yoweri Museveni amazaalibwa amalungi ag’e myaka 74.
Kigambibwa mu kutontoma kw’alimu ebigambo ebivoola Pulezidenti Museveni ne nnyina, omugenzi Esteeri Kokundeka.
Kinnajjukirwa nga 1 August, 2019 Dr Nyanzi baamusindika mu kkomera e Luzira yebakeyo emyezi 18 ku misango gy’okweyambisa obubi, ebyuma bi kalimagezi kyokka omulamuzi yamugirako ebbanga lya 9 gye yamala ku limanda.
