Poliisi ekakasiza nti tewali muntu yenna yakwattiddwa ku ttemu eryakoleddwa olunnaku olw’eggulo ku Mmande, abatuuze webagudde ku mulambo gw’omukyala, ogwasuuliddwa mu kompawundi y’omutuuze Rose Namutebi ku kyalo Katabi Busambaga, Entebbe mu disitulikiti y’e Wakiso.
Okusinzira ku Fred Mugerwa akola ku byokwerinda ku kitundu, omulambo gwalabiddwa omwana eyabadde akedde, okulongosa kompawundi.
Kigambibwa omukyala yatugiddwa era omulambo gwe gwatwaliddwa mu ggwanika ly’eddwaaliro ekkulu e Mulago, okwekebejjebwa.
Wabula amyuka omwogezi wa Poliisi mu Kampala n’emirirwano Luke Oweyesigyire agambye nti wadde Poliisi yasobodde okweyambisa embwa okunoonyereza, tebanakwata muntu yenna wadde okuzuula lwaki omukyala yattiddwa era agumizza abatuuze ku nsonga y’ebyokwerinda.
Okuva 2017 abakyala abakunukiriza mu 20 beebakatibwa mu bitundu bye Ntebbe.
