Poliisi y’e Busia eyongedde okunoonyereza ku muliro ogwasse abayizi 4 ku ssomero lya Busia Victory Primary School.
Ku kyalo Kisenyi B mu Monisipaali y’e Busia mu disitulikiti y’e Busia, abaana 4 bafiiridde muliro ogwakutte essomero ku ssaawa nga 6 ez’ekiro ku Mmande nga 18, March, 2024.
Mugwe Johnson Moses, omwogezi wa Poliisi mu bitundu bye Bukedi South, Poliisi yafunye amawulire ku ssaawa nga 7 ez’ekiro, okutuuka ku ssomero ng’abayizi abamu bakyebase.
Wadde Poliisi yasobodde okuzikiza omuliro, abaana 4 bafiiriddemu ate omu yatwaliddwa mu ddwaaliro ng’ali mu mbeera mbi.
Abaana abaafiridde muliro kuliko Oburu John Richard abadde omuyizi wa P.4, Abdul Ali P.3, Magero James P.5 ne Adero Makhoha P.6 ate omwana ali mu ddwaaliro lya BMK Clinic e Busia, Egesa Alvin P.1.
Ekizimbe ekyayidde mwabaddemu abayizi 62 nga bonna balenzi era ebintu byonna byayidde.
Poliisi egamba nti etandiise okunoonyereza okuzuula ekyavuddeko omuliro ssaako n’abaana okugibwako Ndaga butonde okuzuula bazadde baabwe.
Ebirala ebifa mu ggwanga – https://www.youtube.com/watch?v=ryo-lRCFvI0&t=1s
